អន្តរជាតិ៖ វិស័យបច្ចេកវិទ្យាយោធា និងសន្តិសុខអន្តរជាតិ កំពុងមានការភ្ញាក់ផ្អើល និងជែកដេញដោលគ្នាយ៉ាងខ្លាំង ក្រោយពីមានការលេចធ្លាយរូបភាពអាថ៌កំបាំងមួយសន្លឹក ដែលគេជឿជាក់ថាជាដ្រូន ឬយន្តហោះស៊ើបការណ៍គ្មានមនុស្សបើក (UAV) ជំនាន់ថ្មីបំផុតរបស់សហរដ្ឋអាមេរិក ដែលត្រូវបានរចនាឡើងប្រកបដោយភាពច្នៃប្រឌិត និងប្លែកខុសពីធម្មតា។
ផ្អែកតាមប្រភពព័ត៌មានបែកធ្លាយពីក្រុមអ្នកជំនាញយោធា បានឱ្យដឹងថា យន្តហោះស៊ើបការណ៍សម្ងាត់នេះ ត្រូវបានរចនារូបរាងឡើងដោយផ្អែកលើគោលការណ៍ជីវសាស្ត្រ (Biomimicry) ដោយវាមានរចនាសម្ព័ន្ធស្លាបដែលអាចបត់បែន កម្រើក និងទំពក់បានយ៉ាងរលូនដូចជាស្លាបសត្វបក្សីពិតៗនៅលើអាកាស។ បច្ចេកវិទ្យាស្លាបបត់បែននេះ ជួយឱ្យយន្តហោះអាចផ្លាស់ប្តូរទិសដៅភ្លាមៗក្នុងល្បឿនលឿន និងអាចហោះហើរក្រឡុកក្នុងលំហអាកាសបានយ៉ាងស្ងប់ស្ងាត់បំផុត ដោយមិនបង្កើតជាសំឡេងរំខាន ឬរលកខ្យល់ខ្លាំងនោះឡើយ។
គោលបំណងចម្បន៍នៃការបង្កើតយន្តហោះ «ស្លាបបក្សី» នេះ គឺដើម្បីបង្កើតសមត្ថភាពគេចវេសពីប្រព័ន្ធចាប់សញ្ញារ៉ាដាការពារអាកាសាស (Stealth Technology) កម្រិតខ្ពស់។ នៅពេលដែលវាហោះហើរនៅលើអាកាស ប្រព័ន្ធរ៉ាដារបស់សត្រូវនឹងមានការភាន់ច្រឡំ ដោយសារតែរលកធាតុអាកាសឆ្លុះបញ្ចាំងពីស្លាបបត់បែននោះ មានទម្រង់ដូចទៅនឹងសត្វបក្សីហើរធម្មតា មិនមែនជាទម្រង់នៃលោហៈធាតុរបស់យន្តហោះចម្បាំងនោះឡើយ ដែលធ្វើឱ្យវាងាយស្រួលក្នុងការលបចូលទៅថតរូប និងស៊ើបការណ៍ក្នុងទឹកដីសត្រូវដោយជោគជ័យ។
ទោះជាយ៉ាងណាក៏ដោយ មកទល់ពេលនេះ ក្រសួងការពារជាតិសហរដ្ឋអាមេរិក (Pentagon) នៅមិនទាន់ចេញមុខមកបកស្រាយ ឬទទួលស្គាល់ជាផ្លូវការជុំវិញការលេចធ្លាយរូបភាពយន្តហោះស៊ើបការណ៍ស្លាបបក្សីនេះនៅឡើយទេ ប៉ុន្តែក្រុមអ្នកវិភាគជឿជាក់ថា នេះគឺជាគម្រោងការសម្ងាត់ខ្មៅ (Black Project) មួយ ដែលអាចនឹងត្រូវយកមកប្រើប្រាស់ក្នុងសមរភូមិនាពេលអនាគតដ៏ខ្លីខាងមុខនេះ៕
