ភ្នំពេញ៖ ក្រសួងការបរទេសសហរដ្ឋអាមេរិក បានប្រកាសចាត់វិធានការរឹតត្បិតទិដ្ឋាការ លើបុគ្គលចំនួន ៣២រូប ដែលអាមេរិកកំណត់ថា មានទំនាក់ទំនងជាមួយ Prince Group Transnational Criminal Organization (TCO) និងបណ្តាញផ្សេងទៀតដែលត្រូវបានចោទថា ពាក់ព័ន្ធនឹងការឆបោកជនជាតិអាមេរិកតាមប្រព័ន្ធអនឡាញ។
ចំណាត់ការនេះ ត្រូវបានដាក់ក្រោមគោលនយោបាយរបស់សហរដ្ឋអាមេរិក ក្នុងការប្រើប្រាស់វិធានការទិដ្ឋាការ ដើម្បីកំណត់ការចូលសហរដ្ឋអាមេរិករបស់បុគ្គលដែលខ្លួនចាត់ទុកថា មានជាប់ពាក់ព័ន្ធនឹងសកម្មភាពឆបោកឆ្លងដែន។
ក្នុងសេចក្តីប្រកាសរបស់ក្រសួងការបរទេសអាមេរិក ចំណាត់ការនេះត្រូវបានដាក់ក្រោមចំណងជើងថា “Announcing Steps to Impose Visa Restrictions on 32 Individuals Connected to Prince Group TCO & Others Scamming Americans”។
សហរដ្ឋអាមេរិកបានចាត់ទុកបណ្តាញ Prince Group TCO ថា ជាបណ្តាញឧក្រិដ្ឋកម្មឆ្លងដែន ដែលពាក់ព័ន្ធនឹងប្រតិបត្តិការឆបោកតាមអនឡាញ និងសកម្មភាពហិរញ្ញវត្ថុខុសច្បាប់។ អាជ្ញាធរអាមេរិកក៏បានចោទប្រកាន់ថា ប្រតិបត្តិការមួយចំនួនពាក់ព័ន្ធនឹងមជ្ឈមណ្ឌលឆបោក ដែលមានការប្រើប្រាស់ពលកម្មដោយបង្ខំ។
Chen Zhi (ចេន ហ្ស៊ី) ដែលជាប្រធាន Prince Group ត្រូវបានអាជ្ញាធរអាមេរិកចោទប្រកាន់ថា មានតួនាទីដឹកនាំបណ្តាញនេះ។ ក្រសួងយុត្តិធម៌អាមេរិកក៏បានប្រកាសពីការចោទប្រកាន់ព្រហ្មទណ្ឌប្រឆាំងនឹងលោក Chen Zhi ពាក់ព័ន្ធនឹងការឆបោកតាមប្រព័ន្ធអេឡិចត្រូនិក និងការសម្អាតប្រាក់។
ខុសគ្នាពីការបង្កកទ្រព្យសម្បត្តិ
ការរឹតត្បិតទិដ្ឋាការលើបុគ្គល ៣២រូប គឺជាវិធានការរបស់ ក្រសួងការបរទេសអាមេរិក ហើយមិនគួរច្រឡំជាមួយការដាក់ទណ្ឌកម្មហិរញ្ញវត្ថុរបស់ ក្រសួងរតនាគារ និង OFAC នោះទេ។
OFAC មានវិធានការដាច់ដោយឡែកប្រឆាំងនឹងបុគ្គល និងអង្គភាពដែលអាមេរិកភ្ជាប់ទៅនឹងបណ្តាញ Prince Group។ វិធានការបែបនេះអាចនាំឱ្យទ្រព្យសម្បត្តិ និងផលប្រយោជន៍ក្នុងទ្រព្យសម្បត្តិដែលស្ថិតក្រោមយុត្តាធិការអាមេរិក ត្រូវបានបង្កក និងកំណត់ប្រតិបត្តិការតាមច្បាប់ទណ្ឌកម្មរបស់សហរដ្ឋអាមេរិក។
មិនទាន់មានការបង្ហាញឈ្មោះទាំង ៣២រូបជាសាធារណៈ
ចំណុចដែលគួរឱ្យកត់សម្គាល់ គឺការប្រកាសអំពីវិធានការទិដ្ឋាការនេះ មិនមានការបង្ហាញបញ្ជីឈ្មោះបុគ្គលទាំង ៣២រូបជាសាធារណៈនៅក្នុងព័ត៌មានដែលអាចផ្ទៀងផ្ទាត់បានឡើយ។
ហេតុនេះ ការយកឈ្មោះបុគ្គលដែលមាននៅក្នុងបញ្ជីទណ្ឌកម្មរបស់ OFAC មកអះអាងថា ជា “បញ្ជី ៣២រូប” នៃវិធានការទិដ្ឋាការថ្មីនេះ អាចបង្កឱ្យមានការភាន់ច្រឡំ។
ជារួម វិធានការថ្មីរបស់ក្រសួងការបរទេសអាមេរិកបង្ហាញពីការពង្រីកការប្រើប្រាស់វិធានការទិដ្ឋាការ ប្រឆាំងនឹងបុគ្គលដែលអាមេរិកចោទថា មានជាប់ពាក់ព័ន្ធនឹងបណ្តាញឆបោកឆ្លងដែន ខណៈវិធានការហិរញ្ញវត្ថុរបស់ OFAC គឺជាចំណាត់ការដាច់ដោយឡែក ដែលផ្តោតលើទ្រព្យសម្បត្តិ និងប្រតិបត្តិការហិរញ្ញវត្ថុ។
ប្រភព U.S Department of State